Nigeria biggest telecom company, MTN, don beg customers after dem vex ontop sudden 200% increase for di price of dem popular 15GB data bundle.
Di price hike wey make internet users need to pay **N6,000 for 15GB weekly data plan** instead of **di former N2,000** shock plenty people, as e lead to serious vexation for social media on Wednesday.
For message wey MTN share on social media on Thursday, di company, using informal and friendly tone, acknowledge say di increase pain customers well well, and dem try calm di matter wey don dey hot online.
Di message read:
”To our 15GB digital bundle lovers, we see say una dey vex. We know. We know say e pain you well well as you wake up see 200% increase for your favourite data bundle.”
”We fit give plenty reasons and explain taya, but omo, all dat one na story. We don cast. We understand and we admit am. Make we just talk say na mistake.”
MTN continue di apology, beg customers make dem no too vex again, as dem talk say:
”For dis love season, abeg no vex for us. Make una forgive and forget. You matter die for us and we go continue to show una love. Make we continue our relationship. Thank you for your understanding.”
For now, na only MTN don increase price, but e fit reach Airtel and Glo turn soon, after di Nigerian Communications Commission (NCC) approve 50% tariff increase for January.
Meanwhile, di Nigeria Labour Congress (NLC) don para ontop di matter, as dem don condemn di implementation of di tariff hike, and demand say make telecommunication companies reverse am sharp sharp.
