Three States for Niger Delta don win Supreme Court judgment against multinational oil companies wey dey operate for Nigeria as par oil revenue.
Di 3 States nah Rivers, Bayelsa and Akwa-Ibom. Nah on wednesday wey just pass naim Supreme Court deliver di judgment
Di 3 States say make Supreme Court interpret Section 16(1) of di deep Offshore and Inland Basin Production Sharing Contract Act in suit number SC964/2016.
Nah Mr Lucius Nwosu (SAN) naim carry di case go Supreme Court for di 3 States
Di section talk say federal government need to adjust di shares of di oil revenue to di federal government wen di crude oil price pass $20 per barrel
Nah Justice Inyang Okoro naim deliver di Supreme Court judgement. E don tell federal government to adjust di oil revenue share of di 3 States go up (Rivers, Bayelsa & Akwa-Ibom) anytime di oil price pass $20 per barrel.
Nor bi small jubilation for Bayelsa State governor. E say na victory for all di oil producing States and for di Nigeria federation
Governor Dickson say, even with di water tight agreement on how to share di oil revenue base on di agreement to reflect upward review, di multinational companies still go dey use di $20 per barrel and dat na why dem go Court. Governor Dickson say dis na very sweet victory
Governor Dickson naim speak for di rest of e colleagues. E say wetin di judgement mean bi say, na more revenue to dia States so dat dem fit meet up with dia developmental programmes for dia pipo
E kon salute di Supreme Court for standing by di rule of law and for dem to fit deliver dis judgement
Governor Dickson kon send message to President Buhari, say no time. Make President Buhari start di implementation of di Supreme Court judgement with speed