Nigerians Say Senator Adeleke Don Use E Dance Moves Take Colonise Osun Pipo
Dis days for Nigeria everybody dey discover dia talent wey God give dem and dey use am dey help demsef
Di PDP Gubernatorial candidate for Osun State, Senator Adeleke don already dey use e dance talent dey hold Osun pipo for work.
Osun pipo nor wan reason anything again for di election wey dey come on Saturday. Dem say only Senator Adeleke dance don belle full dem. Say dem go vote for am becos of e dance
Other Nigerians don dey draw Osun pipo ear, say if Senator Adeleke win di election and e nor fit perform, say dem nor wan hear say dem complain or make any noise o.
Becos during di campaign na so so dance Senator Adeleke dey dance. E nor gree talk wetin e wan do for di state. Di debate way Channels Television organise for all di candidates, Senator Adeleke nor show face
Some Nigerians say e nor gree come becos dem nor make room for am to dance for di debate and Senator Adeleke nor dey joke with e dance.
Meanwhile Senator Adeleke say anybody wey nor like e dance steps make di person hide e face or park for one place. E say na since during e days for school e don dey dance and e win plenty competition well well for dancing becos e like to dey dance.
Senator Adeleke say na di dance go carry am go govment house for dis Saturday election