Nigerians say dem don declare November 2nd as Oluwole Day to remember President Buhari for e WAEC result.
Nah today WAEC issue certificate give President Buhari, say Buhari do the WASC exam for six subject. Meanwhile WAEC neva dey exist for northern Nigeria wen Buhari write the exam.
So Nigerians dey wonder how the same WAEC wey issue statement for 2015, say dem nor see any Buhari exam records or aptitude test for dia archives. Kon turn round go give Buhari certificate for exam wey WAEC demsef nor organise.
Di result wey di Katsina Secondary School release for 2015, show say President Buhari do 8 subjects according to di Katsina School. But di one WAEC release today, say na 6 subjects
Nigerians say if President Buhari fit tell WAEC to release e result all this while, why e go use 13 SANs take defend imsef for court becos of e result mata, wey e for just tell WAEC to make am available.
Plenty Nigerians don conclude say President Buhari don embarrass di country big time and don make other countries dey laugh Nigeria. Say President Buhari don commit perjury by lying under oath because e swear affidavit say e original WAEC certificate dey with di military board. Wen e fit get am from WAEC easily. Even di Military don talk say dem nor get or keep any of Buhari academic records.
As we dey publish dis news, President Buhari wey bi di Commander in Chief, neva fit order di Military make dem produce e originals.
Most Nigerians don conclude say as Buhari like to dey rub mind with pipo wey get oluwole certificate wey e nor gree do anything about dem, and as WAEC don go give am certificate today for exam wey dem nor even conduct and don even agree say dem nor conduct any exam for Northern Nigeria during di time Buhari say e write e WASC, say make dem just kukuma declare today as Oluwole Day for Buhari Head.